Prisdryss under tradisjonell markering

Nyttårsmottakinga er ein årleg tradisjon som blir arrangert den første søndagen etter nyttår kvart år. I år var det knapt eit ledig sete av dei 240 plassane i amfiet på Sjøperlo denne ettermiddagen. Musikk frå kulturskulen og digitalt show frå scenen, i tillegg til variert underhaldning, skapte ei fin ramme rundt arrangementet. Endre Fjellheim var den som først imponerte med vakre tonar frå flygelet. Seinare var det Eivind Nilsen Riber som serverte godt innøvd fiolinspel. Gunn Rakel Tjelle Jarmer og Lasse Jarmer stod for den humoristiske biten, medan Rossmann heldt minikonsert til slutt.

Alvorleg tema

Årets hovudtalar var noverande Statsforvantar i Rogaland, Bent Høie. Han la vekt på at me har vore gjennom ei krevjande tid, både når det gjeld krig, dyrtid og klimaendringar. Han minna oss om at kongen brukte sterkare ord enn kva han har for vane å gjere, når han snakka om klimaproblematikken i nyttårstalen sin.

— Verda har blitt våtare, varmare og villare Utviklinga har gått så langt at det ikkje lenger er nok å redusere utslepp og ta vare på urørt natur. Me må også førebu husa våre, vegane våre og samfunnet vårt på konsekvensane av klimaendringane. Det er lett å kjenne på maktesløyse i ein slik situasjon, men eg vil oppmoda alle til å tenkje både på kva du gjer og kva du kan gjere, var noko at det Høie formidla i talen sin.

— Alle er med

Han passa også på å minne om noko av det som allereie blir gjort.

— For det første er det slik at alle de som bur i Vindafjord som fellesskap gjer litt kvar einaste dag, for at verda skal bli ein betre stad. De har teke imot fleire flyktningar enn det storsamfunnet bad dykk om. Vindafjord har også eit næringsliv som bidreg til det grøne skiftet, de har mange bønder som produserer mat, og de har bedrifter som leverer den norskproduserte maten som me alle er så avhengige av, sa Statsforvaltaren.

Høie minna samstundes om at me alle kan ta betre vare på dei rundt oss.

— Mange kjenner på uro i denne tida, og difor er det viktig at me er snille med kvarandre. Det å gjer kjekke ting saman, og ta oss tid til kvarandre, er viktig, sa Høie.

Inkluderande vinnar

Therese Nesheim blei tildelt Omsorgs- og inkluderingsprisen for 2023. Innsatsen i Ungdomslaget Skjoldafjord, bygdalag og velforening blei trekt fram, i tillegg til arbeidet ho legg ned for ungdomsklubben Hippo i Skjold.

— Eg er både stolt, audmjuk og rørt over å få denne prisen. Den motiverer for vidare arbeid, og eg håpar den også inspirerer andre til å engasjere seg i dugnadsarbeid. Det er svært givande, sa Nesheim frå scenen.

Lagpris

Volleyballgruppa til Vindafjord idrettslag fekk Kulturprisen for 2023. Juryen meiner vinnaren av årets pris er ein svært god representant for kulturen, idretten og frivilligheita i Vindafjord kommune. “Vinnaren viser kva ein kan oppnå når gode eldsjeler står i bresjen og vil noko”, heiter det mellom anna i grunngjevinga.

Sterke kandidatar

Kulturstipendet for 2023 er på 30.000 kroner. Ragnhild Aarekol, som driv med langrenn, er den eine vinnaren. Ho har vist at det er godt mogleg å hevde seg i denne vintersporten, sjølv om ein bur i Vindafjord. Sidan ho ikkje kunne vere til stades under mottakinga, var det mora som tok imot prisen på scenen. Den andre vinnaren er Bertine Skipevåg Tveit, som driv med volleyball og strandvolleyball. Juryen trakk mellom anna fram dei gode resultata i NM og på landslaget, som gode grunnar for å få dette stipendet.

— Det var mange gode kandidatar til å få dette stipendet. Det blei til slutt delt i to, i og med at juryen meinte det var to sterke kandidatar som begge fortente å vinne, sa Arild Austreheim då presenterte dei to vinnarane på scenen.

Næringsprisen

Juryen meiner Rune Furseth er ein ypparleg mottakar av Næringsprisen for 2023, både med arbeidet han har gjennomført, det han held på med i dag og planane for framtida. Engasjementet i Suldal transport, Nor-Log, Biovind, Ølen næringspark og Medvind Sandeid er blant det som blir trekt fram.

— Eg kjenner eg er svært stolt over å få denne prisen, fordi eg bur i ein kommune med mykje giv og ekstremt mange flinke folk i kvar einaste bygd. Eg har 1100 kollegaer som eg vil dele denne prisen med, utan dei og familien hadde ikkje dette vore mogleg, sa Furseth i takketalen.

Heilskapleg tun

Byggeskikkprisen i Vindafjord blei delt ut anna kvart år. Prisen for 2023 gjekk til Randi Roaldkvam Berge, og småbruket hennar i Sandeid. Innsatsen for både å ha sett i stand gamle bygningar frå 1933, i kombinasjon med nybygg og utemiljø, gjorde at det var Berge som fekk tildelt denne prisen. Juryen meiner at tunet er eit godt døme på gjenoppbygging av slike tun.

Heider og ære

Heile volleyballgruppa J17 i Vikedal, Tiril Våg Skjold og Bertine Skipevåg Tveit blei også heidra under nyttårsmottakinga.