Over 50 millionar i overskot

— Det er gledeleg å kunne melde at resultatet også i 2025 blei svært bra. Som fleire av dei siste åra er det spesielt eit godt finansielt resultat som dreg opp, men òg høgare skatteinntekter enn me hadde venta påverkar positivt, seier kommunedirektør Yngve Folven Bergesen til Vindafjord kommune si nettside.

Den avtroppande kommunedirektøren seier dei har vore både heldige og dyktige i Vindafjord, som har hatt god økonomi dei siste åra. Han seier at det har gjort at kommunen kan plassere delar av dei oppsparte midlane sine og få veldig god avkastning på dei.

Bergesen understrekar at kommunen ikkje kan budsjettere med så høge finansinntekter som dei fekk i 2025. Historia viser at resultata vil variere, og difor meiner han at dei må leggje inn ei nøktern avkastning i budsjetta. Me ser allereie at utviklinga har vore negativ i januar 2026. Over tid har avkastninga vore svært positiv, men me må vere budde på svingingar.