Det er viktig å ta omsyn til hekkande fugl når frivillige er ute og ryddar.
Foto: Hold Norge Rent
Ordføraren inviterer til vårrydding
Ryddeaksjonsnemnda i Etne inviterer til ryddeaksjon og frir til både lag, organisasjonar og privatpersonar.
Det er ordførar i Etne, Mette Heidi Ekrheim Bergsvåg som tar til orde for vårryddinga i kommunen. Saman med varaordførar Kenneth Lyng Karlsen og Ap-gruppeleiar Siri Klokkerstuen utgjer dei ryddeaksjonsnemnda. Dei kallar ryddeaksjonen for vårens vakraste eventyr, og ikkje minst; vårens viktigaste eventyr. Etne kommune går no ut og oppmodar alle lag, organisasjonar, og privatpersonar til å gjera ein innsats for å få kommunen rein og ryddig. Når vinteren slepp taket er det nemleg mykje rart som kjem til syne, og det forsvinn heller ikkje av seg sjølv.
Sekker og containerar
I år som før vil Etne kommune i samarbeid med Hold Norge Rent og Friluftsrådet Vest, invitera til ryddedugnad i heile kommunen. Det vil bli plassert ut containerar og plastsekker som du kan nytta til dugnaden, og ryddeaksjonsnemnda oppmodar til å ta berre dei sekkene du treng, slik at det blir nok til alle. Containerane blir plasserte i Skånevik ved gamleskulen, i Etne ved drift- og vedlikehald sitt bygg på Enge, ved Sørstranda grendehus og nedanfor bensinstasjonen på Sævareid. Her blir containerane ståande frå 11. til 25. april.
