Avdelingsleiar i Omega 365 Solutions, Vidar Nordnes har hatt som mål å sikra seg fleire lokale aktørar som kundar.
Foto: Linn-Henny Andersen.
Næringsliv
Omega sikra seg viktig havvind-kontrakt
Omega 365 Solutions AS har sikra seg ein fot innanfor flytande havvind.
Omega 365 Solutions, som har hovudkontor i Ølensvåg, men også ei ekspanderande avdeling i Haugesund, skal levere prosjektstyringssystem til energiutviklaren Source Galileo.
– Dette gir oss fleire bein å stå på. Flytande havvind er eit spennande område for oss og for Haugalandet. Vi har lyst til å jobba med fleire selskap innan grøn energi og innovative berekraftløysingar, seier avdelingsleiar i Omega 365 Solutions, Vidar Nordnes i ei pressemelding.
Utsira Nord
Haugesund-baserte Source Galileo skal no ta i bruk prosjektstyringssystemet Omega 365 for dokumenthandtering, kostnader, og kontrakt og plan.
Source Galileo har fleire prosjekt i si portefølje, og har mellom anna inngått samarbeid med Odfjell Oceanwind for å kunne utvikla flytande havvindparker, både for elektrifisering av olje- og gassinstallasjonar, og for å delta i konkurransen på Utsira Nord. I sistnemnde prosjekt har dei òg fått med seg IKEA og den japanske energigiganten Kansai.
– Nøkkelen til suksess for alle prosjekt er å ha full kontroll i alle ledd. Vi har over tid vurdert fleire verktøy som hevdar å gi oss dette, men kombinasjonen av brukarvennlegheit, funksjonalitet og ikkje minst service var klart best hos Omega 365. At vi i tillegg kan finne denne typen verktøy og kompetanse lokalt er jo også noko vi i Source Galileo heiar fram, fortel Stian Røsdal, teknologisjef i Source Galileo og prosjektleiar for Utsira Nord.
Satsar lokalt
Sidan Haugesundskontoret til Omega 365 opna i januar 2021, har målet til Vidar Nordnes vore å sikra seg fleire lokale aktørar som kundar.
– Med tanke på marknaden her på Haugalandet så hjelper det veldig at vi har kontor i Haugesund. Då vi flytta inn tidleg i 2021 var vi seks tilsette, no er vi godt over 30. Sjølv om vi no byrjar å bli vane med digitale møte med kundar så er det noko spesielt i å kunne møtast ansikt til ansikt, seier han.
Auka ordremengde gir òg behov for å rekruttera framover. Det fører òg til at vi er på jakt etter fleire tilsette med kompetanse som vi treng framover, opplyser han.
