Glade for vegopning

— Eg tør ikkje tenkje på konsekvensane dersom vegen hadde vore stengd i påsken. Me er sjeleglade for at den blir opna fredag, seier dagleg leiar John Karsten Hustveit i Åkrafjordtunet.

Frå fredag set Statens vegvesen opp kolonne for passering av skredstaden i Fjæra. Som næraste butikk og restaurant til der vegen er stengd, har Åkrafjordtunet vore utan sin vanlege gjennomfartstrafikk heilt sidan skredet ved Fjæra gjekk 1. mars.

Hustveit var likevel ved godt mot då han kommenterte vegopninga etter ei samling i Medvind 24 Næringshage sitt reiselivsnettverk måndag kveld. Han rosar Vegvesenet og samarbeidspartnarar for å ha rydda og ordna i krevjande forhold, og fortel at Åkrafjordtunet har levert mat til arbeidsfolk som har jobba med oppryddinga.