Dømt for høg fart i 50-sone – mistar førarkortet i eitt år

Hendinga skjedde i november i fjor, i Haugesund. Politiet hadde då plassert seg i ei busslomme langs vegen då dei høyrde mykje motorlyd og observerte to bilar som kom køyrande sørover. Ifølgje politiet akselererte den eine bilen ut frå rundkøyringa i området. Politiet køyrde etter bilen og målte farten til 85 kilometer i timen over ei strekning på rundt 500 meter. Fartsgrensa på staden er 50 kilometer i timen. Bilen blei kort tid etter stoppa ved Burger King i området. 

Nekta for målinga

Mannen forklarte i retten at han ikkje var einig i fartsmålinga. Han meinte sjølv at farten låg rundt 60 kilometer i timen. Under forklaringa opplyste han at speedometeret i bilen skal ha slutta å fungera ei kort stund. Då det byrja å fungera igjen, meinte han at det viste rett under 70 kilometer i timen. Han hevda også at speedometeret i bilen vanlegvis viser nokre kilometer i timen for mykje. Ei kvinne som sat på i bilen støtta forklaringa hans i retten. Ho forklarte at ho opplevde farten som rundt 60–65 kilometer i timen.