Næringsliv
Ny stor Westcon-avtale
Avtalen er med Odfjell Drilling Ltd., Odfjell Technology Ltd. og Odfjell Oceanwind AS. Avtalen gjeld på tvers av alle Odfjell-selskapa. Dette opplyser Westcon Power & Automation (WPA) i ei pressemelding onsdag.
— Me er svært nøgde med at Odfjell-selskapa har vist oss denne tilliten, og me ser på det som ei stadfesting på at arbeidet og samarbeidet sidan 2019 har vore i tråd med forventningane, seier leiar Jo Kåre Rekkedal for inspeksjon og vedlikehald hos Westcon Power & Automation i pressemeldinga.
Annonse
Med opsjonane inkluderte er den potensielle verdien av avtalen estimert til rundt 420 millionar kroner, ein av dei største avtalene WPA har signert.
Viktig suksessfaktor
WPA har hovudkontor på Westcon-verftet i Ølensvåg og avdelingar i Bergen og Florø. Med over 30 års erfaring er WPA ifølgje seg sjølv i dag ein av dei leiande aktørane på installasjon av marine elektro- og automasjonssystem. Selskapet fokuserer sterkt på miljøteknologi og energieffektivisering i alle segment, og leverer tenester til prosjekt- og serviceoppdrag både on- og offshore.
Rekkedal fortel at WPA no ser fram til eit vidare konstruktivt og nytenkjande samarbeid med Odfjell-selskapa i åra som kjem. Ansvarleg for elektriske anlegg Hallvard Atle Bjånesøy i Odfjell Drilling kommenterer:
Annonse
— Det å ha gode underleverandørar er ein viktig suksessfaktor for optimaliseringa av prosjekta til Odfjell Drilling og for den samla leveransen.
Nye arbeidsplassar
Kontraktsansvarleg Daniel Skoglund, som talar på vegner av kontraktsteamet i Odfjell Technology, seier at dei ser fram til å vidareføre det gode samarbeidet med WPA i åra som kjem.
Sidan 2019 har WPA levert tenester innan inspeksjon av Ex-utstyr og elektroinstallasjonar til Odfjell-selskapa. Samarbeidet mellom selskapa har gradvis auka i omfang, og tilsette i WPA har dei siste åra reist verda rundt på oppdrag for selskapa. I pressemeldinga skriv WPA at med rigger spreidde over heile verda og ei imponerande flåte, vil rammeavtalen gi fleire oppdrag i dei kommande åra.
Rammeavtalen tredde i kraft 1. november 2024 og har ei varigheit på fire år, inkludert tre eittårsopsjonar. Arbeidet vil strekkje seg ut over fleire avdelingar hos WPA og skapa nye arbeidsplassar ved avdelingar i Ølensvåg og Bergen.
— Arbeidet me skal utføre for Odfjell-selskapa vil skapa behov for fleire tilsette hos oss. Me ser allereie eit kommande behov for fleire ingeniørar og utførande personell i felt, fortel Rekkedal.
