No er Renberg-suksessen klar scena i Etne

No skal suksessframsyninga på turné med Teater Vestland, og tysdag 30. januar er det Skakke sin tur.

— Ver om deg denne eine dagen vi kjem til bygda di. Framsyninga har vunne hjarta til publikum og kritikarar over heile landet og får unisont gode tilbakemeldingar, seier teatersjef Cecilie Grydeland Lundsholt i ei pressemelding.

Familiehistorie

Tollak til Ingeborg» er eit sjeldan mannsportrett og ei tragisk familiehistorie, men òg ei gripande forteljing om kjærleik. Nynorsken har fått ein ny klassikar», skriv kulturredaktør Jens Kihl i Bergens Tidende.

Mange føler at dei kjenner ein Tollak, og det er styrken ved universet forfattar Tore Renberg har skapt, meiner teatersjef Cecilie Grydeland Lundsholt.

— Du får sympati og medkjensle med mannen som samfunnet har sprunge ifrå, han som ikkje veit korleis han skal betale rekningane i nettbanken og som vil at barnebarna skal sitje mindre på mobilen. Kva verdiar har gått tapt? Du begynner å bli glad i han. Så skjønner du at han har gjort noko utilgiveleg, og du blir ståande i eit emosjonelt spenn som det er uhyre interessant å utforske, seier teatersjefen.

Skodespelarane

Kyrre Eikås Ottersen, skodespelar ved Teater Vestland, står på scena i rolla som Tollak saman med fire andre: Andrine Sæther, Sebastian Biong, Malene Wadel og Harald Ottesen Nødtvedt.

Regien er ved Miriam Prestøy Lie, som har markert seg med ei rekke kritikarroste framsyningar, og dette er det fjerde samarbeidet hennar med bergenskomponisten Selma Stang, som har gjort suksess med Aurora. Det visuelle universet er skapt av scenograf Milja Salovaara og lysdesigner Martin Myrvold.

Tollak til Ingeborg» er produsert av Teater Vestland i samarbeid med Riksteatret, og i eit felles krafttak gir dei to teatera nynorsk til heile landet. I løpet av fjoråret turnerte Riksteatret til 65 spelestader, og no tar Teater Vestland over stafettpinnen.

13.000 såg Tollak til Ingeborg i løpet av fjorårets opningshelg i Nynorskhuset i Førde og på turné med Riksteatret landet rundt. Nesten tjue kulturhus i Vestland står for tur på turné med Teater Vestland.