Styreleiar Elling Hetland (nærmast) og brannsjef Dag Botnen då dei var i formannskapet i Etne for å informere om konflikten i Haugaland brann og redning.
Foto: Jon Edvardsen
Mannskap rapporterer om hets på sosiale medium
Tilsette i indre strøk av Haugaland brann og redning opplever det dei meiner er klar trakassering på sosiale medium frå leiarar i ytre del, med bakgrunn i brannvesenet på Karmøy. For to dagar sidan var brannsjef Dag Botnen og styreleiar Elling Hetland kalla inn på teppet hos politikarane i Etne.
Grannar har fått tilgang til eksempel på sosiale medium som dei som blir utsette for det, meiner ikkje passar seg i omtale av kollegaer. Spesielt når uthenginga kjem frå leiarar, og det dertil kokar av misnøye i brannkorpsa ikkje minst i Etne, men også i Ølen og Suldal.
Personar som opplever å bli offer for uthenging, meiner det er trakassering og hetsing.
Ein del av det er over eitt år tilbake i tid, men samstundes som granskingsrapporten om bekymringsmeldingar i Haugaland brann og redning (HBR) var under arbeid av eksterne konsulentar.
