Mange vel å stemma før valkampen er over
I løpet av dei åtte første dagane av den ordinær førehandsstemmeperioden mottok Vindafjord kommune 221 førehandsstemmer. I Etne kommune var talet høgare enn normalt med over 100 stemmer.
Årets stortings- og sametingsval nærmar seg, og for ei dryg veke sidan gjekk startskotet for den ordinære førehandsstemmeperioden over heile landet. I Vindafjord kommune betyr det opne dører på Sjøperlo og i Etne kommune står stemmeurnene klar til å ta i mot førehandsstemma ved tinghuset i Etne sentrum.
Av totalt 6.027 med stemmerett i Vindafjord i år mottok kommunen til og med 17. august 221 førehandsstemmer fordelt på 210 stemmer frå folk tilhøyrande i Vindafjord og 11 tilhøyrande i andre kommunar. Ei av dei som nytta seg av høvet til å røysta på førehand var Merete Leknes-Tysse (43) frå Ølen som onsdag føremiddag stakk innom Sjøperlo i Ølen for å gjera si borgarplikt.
— Eg pleier alltid å førehandsstemma og gjer det når eg har høve. Dukkar det opp noko på valdagen, så er det gjort. Det er viktig å stemma. Eg har stemt sidan eg var 18 år, seier 43-åringen frå Ølen etter at årets stemmesetel er trygt plassert i urna på Sjøperlo.
