Vindafjord kommune og Westcon eig kvar sin halvdel av Dommersnes AS/Windafjord Port. Selskapet har som formål å utvikle Dommersnes industriområde i Vikebygd. Utviklinga er planlagt i tre fasar. Fase 1 medfører at 54 dekar av det eksisterande industriområdet blir planert ned til kaien sitt høgdenivå. Fase 2 legg opp til å ta enda meir areal i bruk, mens fase 3 vil krevje over 500 mål og at Vikevegen blir lagt om. Det er tidlegare søkt om å gå i gang med fase 1 basert på ein reguleringsplan frå 1980, mens vedtaket av planprogrammet i formannskapet tysdag var eit steg mot ein ny reguleringsplan for fase 2 og 3.
Planprogrammet med konsekvensutgreiing for detaljregulering for industri- og hamneområde på Dommersnes i Vikebygd var klart i slutten av februar. Der er det definert ti tema som skal konsekvensutgreiast: naturmiljø/naturmangfald, lokalsamfunn, friluftsliv, landskap, klimagassutslepp, vassmiljø, overvatn, støyforureining, naturressursar sjø og land, og trafikk, areal og transport på sjø og land.
— Det er bra at ein får ei brei utgreiing, sa Mats Årvik (Frp).
