Lokale artistar imponerte i Skjold-kyrkja

Ei nesten fullsett Skjold kyrkje fekk først høyra Jens Magnar Tveit fortelja om arbeidet i det såkalla kulturrådet» og kva dei hadde gjort for å få realisert nytt lyd- og lysanlegg i kyrkja.

Vel tok det ein god del år mellom at idéen vart lansert i 2009 til han nesten var realisert like før pandemien slo inn i 2020.

— Pandemien gjorde at bestillingar med lang leveringstid vart kansellerte, så derfor står me her i dag med konsertmessig debut for anlegget, informerte Jens Magnar Tveit.

Gospel og pop

Det kan ikkje berre ha vore lydanlegget som gjorde at opplevinga for publikum var så bra, men spenstig lyssetting og god lyd frå Jens Magnar Tveit sitt miksebord gjorde inntrykka endå sterkare.

Elisabeth Stople Gregersen gjorde det klårt at alle songarane var frå bygdene Vikebygd, Vats og Skjold, og dei fleste av musikarane frå same stader. Ho understreka at det var songarane som hadde fått boltra seg med å velja ut repertoaret for kvelden.

Frå dei første flotte låtane kunne det sjå ut til at dette ville bli ein gospelkveld. Det ville vore heilt fint for publikum det, men så gjekk det over i poplåtar som nok var kjende for dei fleste, men likevel i sjiktet bak dei mest spelte. Det er ofte der skattane ligg, og nivået vart sett gjennom Toto sin Hold the line» med Elisabeth Stople Gregersen som hovudsongar.

Høgdepunkta

Kvar enkelt publikummar fant nok sine favorittstunder, men etter applausen å døma var noko av det best mottekne då Kjetil Ohm gjorde Dagfinn Lyngbø sin tolking av Kaizers Orchestra sin Hjerteknuser». Denne versjonen laga Lyngbø som hyllest til far sin som var gått bort, og det vart truleg ettertenksame minuttar medan folk høyrde Ohm si flotte framføring.

Mot slutten glei det over i religiøse tekstar. Då Ingebjørg S. Velde song Blott en dag» på svensk var det svært høgt nivå på konserten. Då hadde Arne Tveit tatt plass ved kyrkjeorgelet, noko som gjorde opplevinga endå sterkare.

Ei overrasking var då søstrene Iselin Eidhammer Tveit og Malin Eidhammer Krakk song på eigen dialekt det svenske bandet Kent sin melodi Sverige». Det er Iselin Eidhammer Tveit som har oversett den til lokale forhold og dialekt. Songen har fått tittelen Vesle heimbygd» og kan ha potensial i seg til å bli ein vakker bygdesong for Vats, Skjold og Vikebygd.

Musikarane har ein tendens til å ikkje få den merksemda dei fortener. I Skjold kyrkje var dei tydelege både visuelt og musikalsk. Dei forsterka dei flotte vokalprestasjonane, og dei var solid samansett med instrument som stod godt til kvarandre.

Ida Haraldseid frå Skjold og Elisabeth H. Hamre frå Aksdal kosa seg frå første rad med musikken.

— Eg kjenner vel nesten alle der framme, så eg ante kva eg hadde i vente. Likevel overgjekk dette forventingane mine, seier Ida Haraldseid.

Kulturkyrkja

Jens Martin Tveit uttalte etter konserten at han med dette håpar at kyrkja i Skjold kan bli Vindafjord si kulturkyrkje. Ei moderne kyrkje kan tilby fasilitetar for slike arrangement kor eit stort tal artistar har plass til å boltra seg.

— Eg veit at me vil få mykje glede av dette nye anlegget i åra framover. Det var ein vellukka debut i kveld, men ein må ikkje gløyma at vanlege gudstenester og andre arrangement i kyrkja òg vil ha glede av dette, seier Tveit.

Han seier òg at anlegget allereie er tatt i bruk ved slike høve, og at det er lett å betena og faktisk har gjort at høyrslehemma har uttalt at dei ikkje treng kopla inn teleslynga i kyrkja.

Ei anna flott side ved arrangementet var at det var gratis inngang, men publikum vart på diskret vis oppfordra til å gi til Redd Barna.