Lærer seg knivmakarkunsten
Dei spikkar og pussar. Syr og formar. Men viktigast av alt er småpraten og kaffikosen når den vesle gjengen godt vaksne karar møtest til sin faste knivmakarkveld i verkstaden på det gamle bedehuset i Etne.
Ein gong i veka set ein liten gjeng nevenyttige karar av nokre ledige timar for å læra seg kunsten å laga sine eigne tolleknivar. Det har dei gjort kvar einaste veke dei siste månadane. Tysdag la dei siste hand på verket og kunne stolt visa fram kvar sin knivskarpe tollekniv med blankpolert skaft og formsydd slire. Alt laga for hand etter prøve-og feilemetoden.
— Nå er eg overraska av meg sjølv, seier Jakob Eskeland (81) og kikkar ned på kniven han held i handa.
Den ferske knivmakaren er godt nøgd med resultatet og glad for at han har bestått eldprøven som hobby-knivmakar.
