Øystein Børve fekk både kake og andre gåver då overtakinga av Gjerde gard blei markert fredag, to dagar før han formelt overtar garden.
Foto: Grethe Hopland Ravn
La 11,5 millionar på bordet for nabogarden
Øystein Børve er ikkje meir enn 18 år gamal, og søndag overtar han Gjerde gard i Etne. 11,5 millionar kroner har han lagt ut for landbrukseigedomen, og har både planar og pågangsmot som bonde.
Eit stort påspandert kakestykke smakar godt når representantar frå både Nortura, Tine, Fiskå mølle og Etne bondelag møter på tunet på Gjerde gard i Etne, for å gratulera den ferske bonden med ny gard. Søndag overtar Øystein Børve garden, som ligg side om side med garden han sjølv er oppvaksen på. Seljar er Jens Birger Gjerde.
— Eg har alltid vore interessert i dyr og maskinar, og har gått på landbruksskule på Voss. Planen var i utgangspunktet å studera jus, eller å bli veterinær, for i utgangspunktet hadde eg ikkje gard å overta. Det var bror min som hadde odel på foreldra mine sin gard, seier 18-åringen.
Men når nabogarden kom for sal, slo han like godt til. Dermed studerer han dette året til full studiokompetanse med realfag, og neste år vil han gjennomføra vinterlandbruksskulen i Ryfylke for å bli agronom.
