Skjold Arena har sidan 2010 gradvis oppgradert seg, og står i dag fram som eit lyst og oppussa bygg. Ifølgje dagleg leiar Siri Alice Nonslid er det berre nokre få bøttekott som gjenstår før alt er renovert. Større har bygget også blitt, for IL Skjoldar har bygd på eit ekstra lager, og UL Skjoldafjord har fått eit utvida klubbrom.
No er dei alle klar for ein haust som inneheld fleire kulturelle innslag.
— Me startar opp 6. september og arrangerer historisk kveld om Skjoldavik. Då kjem Nils Olav Østrem og Inghart Lasse Tveit for å snakka om barndommen i Skjoldavik, gamle prestar, kyrkja, handel og gruva som tettstad. Dei kjem også innom ein kunstnar som blei fødd på slutten av 1800-talet og som vaks opp i Skjold, fortel Nonslid.
