Nye detaljar i kraftlinjesaka

Det var Statnett som tok initiativ til møte med Etne kommune 18. februar 2026 for å orientera om arbeidet med spenningsoppgradering av kraftleidninga Sauda–Blåfalli til 420 kV. I møtet presenterte Statnett status for utgreiingane, kva trasear som er aktuelle, og resultat frå konsekvensutgreiinga. Samtidig bad Statnett om innspel frå kommunen på val av trasé. Frå kommunen deltok mellom andre ordførar Mette Heidi Bergsvåg Ekrheim og Erik Kvalheim, mens Statnett var representert ved Ingvild Ytterdal og Audun Tveiten, kjem det fram i referatet.

Vil flytta trasé for å skjerma tursti

Eit av dei konkrete innspela frå Etne kommune gjeld området rundt Storavatnet og Litlavatnet. Kommunen ønskjer at Statnett vurderer om traseen kan førast ned mot Hellaugsvatnet. Bakgrunnen er ønsket om å unngå at kraftleidninga kryssar ein mykje brukt tursti til Flåtevatnet. Statnett opplyste i møtet at dei vil undersøka om ei slik løysing er teknisk mogleg å gjennomføra.