Plukka ut til talentutviklingsprogram

— Dette betyr veldig mykje. Her får eg utvikla meg vidare og få erfaring. Det er veldig inspirerande og motiverande at eg får vera med, seier Tiril Våg Skjold.

Morgendagens Olympiere (MO) er Norges Volleyballforbund sitt talentutviklingsprogram i sandvolleyball, utvikla i samarbeid med Olympiatoppen for å utvikla unge talent til internasjonalt seniornivå. Programmet tilbyr dedikert trenaroppfølging, treningssamlingar med landslag og internasjonale moglegheiter. Uttaket blir gjort av eit trenarteam frå seniorlandslaga i samarbeid med leiar for Sport og prestasjonsutvikling. Utøvarane blir vurdert ut frå sportslege og mentale ferdigheiter etter internasjonal standard.

Tiril, som spelar for Vindafjord IL, er ei av til saman sju damer i alderen 19 til 23 år frå heile Norge som er plukka ut til talentutviklingsprogrammet som har samling i slutten av mai. Også lagvenninna i Vindafjord IL, Sofia Meling Mo frå Bergen, står på lista over utøvarar som får delta.