Klare for å lage liv
Desember er tid for julekonsertar med Skakkekoret. Til i år har dei øvd inn fleire nye sjangrar og fått med seg fullt band.
— Det blir soul, blues, jazz, samt noko gospel i midten, fortel dirigent Audny Åsheim.
Skakkekoret består av 20 kvinnelege songarar og dirigenten Åsheim. Ho har mista teljinga på kor lenge ho har vore dirigent, men kjem fram til at det er minst 20 år. På tidlegare julekonsertar har koret typisk hatt med seg to-tre musikarar og lagt opp til kyrkjekonsertar.
Annonse
— I år har me piffa det opp litt, seier Åsheim.
I rute
Åsheim forklarar valet av sjangrar med at koret følte for å få nokre nye utfordringar. Årets konsertar har namnet Cool Yule og blir på Skakke 7. desember og Skjold Arena 10. desember.
På scenen får koret med seg sju musikarar på komp og blås. Rune Rødne er kapellmeister og på tangent, Arne Haugen på trommer, Geir Marius Halleland spelar gitar, Tom Phuangkaew Bjørnsson bass, Morten Odeen trombone, Jardar Havikbotn trompet og Jan Terje Rafdal saxofon. Åsheim seier at kvinnene i koret likar å ha med seg musikarane. Ho synest at det er knallkjekt å skulle ha konsert igjen.
Annonse
I april starta koret med øvingar kvar tysdag. Nå har dei begynt med helgeøvingar saman med bandet på Skakke. Åsheim seier at julekonsertar vanlegvis pleier å vere enkle, grunna kjente songar, men at så godt som alle songane er nye i år.
— Fram til nå har det vore litt meir utfordrande med nye sjangrar, men nå begynner det å bli ganske bra, seier dirigenten.
Gjer noko saman
Koret består av ei god spreiing av kvinner busett i Etne og Vindafjord. Nokre er nye mens andre har vore med i mange år. Ei av dei fem som er med for første gong er Ruth Økland. Det har gått fint for Økland å komme inn i gjengen, som ho omtalar som kjekk, raus og inkluderande.
Økland fortel at ho alltid har synst det verker kjekt å vere med i eit kor. Som liten var ho med i barnekor. Ho seier at Skakkekoret såg kjekt ut og at forskjellige faktorar gjorde at tida nå var inne for å bli med.
— Det handlar om å gjere noko saman og at det er kjekt å synge. Her får ein utfordra seg på mange ulike sjangrar innan musikk, seier Økland.
Annonse
Ho fortel at publikum kan vente seg mykje trykk på konserten, med blant anna fleire amerikanske songar. Dei håpar på fullt hus i både Skjold og Etne, men er klar over at dei konkurrerer med mange julekonsertar.
Helgeøvinga i innspurten går gjennom heile dagen både laurdag og søndag. Mellom innøving av songar som Amazing Grace samla dei seg til lunsj med mat medlemmer hadde tatt med. Humøret var på topp og det sosiale miljøet verker å fungere godt.
— Det er veldig kjekt at me er deltakarar i alle aldrar, seier Hege Windsand.
Den yngste er Christine Grumheden som er med for første gong. Windsand på si side har vore med heilt sidan koret sin oppstart. Nå ser gjengen fram til å snart kunne vise kva dei kan framfor publikum.
— Me gler oss alltid til det, avsluttar Ellen Hatteland.
