Fryktar at dette skal skje også her

Siste døgns katastrofale brann i Nord-Trøndelag der nærare hundre hus måndag kveld var tapt, fører til brannførebyggande skjerping fleire andre stader i landet.

Tysdag bestemte brannsjefen i Etne og Vindafjord å innføra mellombels forbod mot bruk av open eld utandørs.

Det er på grunn av tørke og sterk vind som gir den store brannfaren lokalt og fleire stader på Sør-Vestlandet. Etter at desember var ein månad full av regn, har januar knapt hatt nedbør. Når det i tillegg har blese godt, er det blitt knusktørt i det snølause terrenget.

Haugaland- og Sunnhordland 110-sentral sendte i dag ut ei pressemelding om situasjonen og brannfaren lokalt:

— Kraftig vind kombinert med lite nedbør, har ført til at det nå mange stader er svært tørt i skog, skogbotn, utmark og liknande. På bakgrunn av dette vil 110-sentralen for Haugaland- og Sunnhordland oppfordra til å visa stor grad av varsemd ved omgang av open eld, varme arbeide, røyking med meir.

Siste: Vindafjord brannvesenet rykte tysdag ettermiddag ut og påla sløkking av bålbrenning i Ølen.