Framleis nok å gjera for blikkenslagaren
Han har fagbrev som platearbeidar, isolatør og stillasbyggjar, og kan kunsten å forma tynne metallplater til funksjonelle produkt for bruk både inne og ute. Med base i Ølmedal leverer Bjørn Joar Haugland (39) i Bjblikk AS eigenproduserte handverksprodukt til kundar heile i distriktet.
Kopar- og blikkenslagarfaget har lange tradisjonar her til lands og har heilt sidan 1200-talet vore eit viktig og vel akta handverk som har sytt for kjelar og bruksgjenstandar til hushaldningane i fleire hundre år. På 1800-talet utvikla faget seg til å bli eit bygghandverksfag med tak- og beslagarbeid, taktekking og pipebeslag på oppdragslista.
I dag er arbeidsområdet ytterlegare utvida til å omfatta fasadearbeid, montering av takrenner, ventilasjonssystem og diverse andre produkt laga av spesialforma metallplater. Ved den vesle bedrifta Bjblikk AS i Ølmedal, sør i Vindafjord kommune, blir dei fleste fagområda dekt og eigar og dagleg leiar Bjørn Joar Haugland har ein stor marknad å betena.
— Eg har faste kundar i Sauda, Suldal, Vindafjord, Tysvær og heilt til Haugesund, seier Haugland som driv med det meste innan blikkenslagararbeid.
