Eikemo er ikkje av bygdene som får utbygd breiband i denne omgang.
Flyfoto: Espen Mills
Fleire bygder skal få breiband og mobildekning
Det er framleis utkantstrøk i Etne som ikkje har mobildekning, men no ser det ut til at to område skal få ei løysing. To andre område må smørja seg med tolmod ei stund til.
Mens dei fleste av innbyggjarane i Etne kommune har hatt mobildekning i årevis, er signala i Skjold/Øyno, Kvammen/Håheim, Tungesvik/Vatnadal og Eikemo svært dårlege.
Nokre av stadene er signala ikkje-eksisterande. Dette skal endeleg ordnast opp i etter at Etne kommune fekk tilskotsmidlar på over seks og ein halv millionar kroner frå fylkeskommunen i fjor. Mykje kan bli gjort for desse pengane, men å få på plass breiband i alle småbygdene er det ikkje nok pengar til.
Kommunedirektør Filippo Ballarin kom med forslag om å byggja ut fiberdekning til Skjold og Øyno, mens dei andre måtte venta. Det var ikkje politikarane i Etne einige i, og eit forslag frå Sjur Aakra og Senterpartiet om å byggja ut fiberdekning for både Skjold, Øyno, Kvammen og Håheim fekk fleirtal.
