Fekk storfisk på første dag
Sveibuane Anders Tendeland og Flemming Lothe tok turen til Vikedalselva for å starte fiskesesongen frå midnatt onsdag. For Tendeland enda den første fiskeøkta med 8,5 kg laks på kroken.
— Det var heilt fantastisk! Og heilt uventa, seier Tendeland på telefon nokre timar etter.
Han beskriv fangsten som rein nybegynnarflaks og fortel at han berre er med den meir dedikerte fiskaren Lothe som stod igjen når Grannar tok turen til elva onsdag morgon. Det blei ei magisk oppleving for Tendeland å få storfisken på kroken i sone 13 av elva.
Klokka 09.13 onsdag er det rapportert inn totalt ti fangstar i Vikedalselva. Lothe fortel at han og Tendeland stod og trippa i minutta fram til startskotet gjekk ved midnatt.
