Saman om Deep Wind Offshore. John Martin Mjånes (t.v.), Kjetil Harkestad, Olav Linga, Knut Vassbotn, Trygve Seglem.
Foto: Haakon Nordvik
Etablerer havvindselskap
Haugaland Kraft AS, Sunnhordland Kraftlag AS og reiarlaget Knutsen OAS etablerer havvindselskapet Deep Wind Offshore. Planen er å utvikla havvindprosjekt i Noreg og internasjonalt.
Norge opna opp to område for havvind 1.januar 2021 og tre regionale partnarar vil nå vera med i dette energiprosjektet.
— Sør-Vestlandet har ein lang maritim tradisjon, bygt på næringar som fiskeri, skipsfart, olje og gass. Fornybar kraftproduksjon har også lange tradisjonar i Noreg. Samfunnet starta elektrifiseringa for over hundre år sidan. Skal Noreg fullelektrifiserast, vil det vera behov for ny fornybar kraft. Kunnskapen me har tileigna oss frå disse næringane er relevant for utvikling av ein ny havvindindustri, heiter det i ei pressemelding frå dei tre partnarane.
Dei ser på Utsira Nord som ideelt plassert for å tilføra ny fornybar elektrisitet til ein region med eit forventa betydeleg kraftunderskot. Sørlege Nordsjø II kan bli ei opning for Noreg som leverandør av fornybar energi til Europa. Det nye selskapet har ei erfaren leiing samt industrielle eigarar med komplementær kompetanse.
