Dommersnes-sjefen måtte tole kritikk frå bygdefolk

— Eg føler at du fordummar meg, sa Brit Nelly Ness Tveit.

To gonger reagerte ho på dagleg leiar Jørgen Jorde i Windafjord Port sine skildringar og etterlyste ærlegheit. Den første var knytt til storleiken og korleis eventuelle vindmøller og produksjonen av dei vil merkast på ulike stadar i Vikebygd. Ness Tveit fekk applaus frå store delar av salen for å løfte denne problemstillinga.

Jorde viste fram ei rekke illustrasjonar av korleis produksjonen potensielt vil sjå ut frå ulike vinklar. Fleire var kritiske til at Jorde sin illustrasjon av området frå fugleperspektiv berre viste fase 2, der cirka 200 mål av området er utvikla, og ikkje fase 3 der heile det cirka 500 mål store området er tatt i bruk. Den daglege leiaren forklara dette med at fase 3 framleis er tidlege tankar.