Biskopane tilrår å utsetje konfirmasjonane til hausten

Avisa Dagen skriv at det torsdag morgon vart sendt ut ein e-post til alle prestar og kyrkjeverjer i Bjørgvin bispedømme på vegner av alle biskopane i landet.

Der står det at på grunn av den usikre situasjonen med utviklinga til pandemien, så har biskopane vorte samde om å tilrå at ein lokalt vurderer om konfirmasjonar planlagt til våren bør utsetjast til hausten.

I e-posten nemner biskopane utbrotet av virusmutasjonen, uvisse rundt kva reglar som vil gjelde for kor mange som kan samlast og reise mellom regionar i Noreg, og dessutan det at vaksinasjonane tek lengre tid enn planlagt, som årsaker til tilrådinga.

Dagen skreiv onsdag at Birkeland kyrkjesokn i Bergen, som er eitt av dei største i landet, har valt å utsetje konfirmasjonane i vår til hausten.

Torsdag og fredag er det kyrkjerådsmøte. Halvor Nordhaug, biskop i Bjørgvin, trur konfirmasjonsutsetjingane vil bli drøfta der.

— Men til sjuande og sist er det ikkje biskopar eller kyrkjeråd som bestemmer, men kyrkjelydar og sokneråd, seier Nordhaug.