Solveig Kvamme (t.v.) fekk presentert arbeidet i Etne Frivilligsentral for KrF-toppane i Hordaland, under valkampturneen på fredag. Kommunestyrerepresentant Knut Erik Ebne i gult, fylkessekretær Ylva Bang, leiar i Etne KrF, Øyvind Kaldheim, 5. kandidat Beate Husa (skjult), 3. kandidat Yoel Ystebø og 1. kandidat Dag-Inge Ulstein.
Foto: Anita Haugland
Bekymra for frivilligsentralane
Det er ikkje få aktivitetar Etne Frivilligsentral er involvert i. Sentralen samarbeider mellom anna med biblioteket for å skape trivelege møtestader for barn og ungdom, dei arrangerer seniortrim i Etne og Skånevik, dei har måndagskaffi, sitjedans, dei tilbyr handlehjelp, bingo og meir.
— Eg ser at du er både engasjert og kreativ. Det er nettopp slike personar me treng på frivilligsentralar som dette, seier Beate Husa, som står på 5. plass på Hordaland KrF si stortingsvalliste.
Fredag ettermiddag var toppkandidatane i KrF Hordaland, med unnatak av Astrid Aarhus Byrknes (2. plass), på besøk hos Frivilligsentralen i Etne. Her fekk dei ei orientering om arbeidet som blir gjort i dag, og kva som trengst for å oppretthalde tilboda framover.
