Avgjerande tid for bygda

— Saka er så anspent at mange ikkje snakkar om det. Me må tore det å vere sakleg ueinige, sa leiar Gunn Vikingstad i Vikebygd Grendautval.

Ho meiner saka er vanskeleg for grendautvalet og håpar på fullt hus under årsmøtet neste torsdag. Då kan flest mogleg bidra til deira høyringsinnspel.

Etter møtet fortalde Vikingstad at ho personleg blir ganske frustrert av saka, og føler at bygda har stått på vent i eitt år. Ho opplever at det har blitt eit vakuum som ho er redd for vil skade bygda i lang tid framover.

Håpar på mange innspel

Windafjord Port/Dommersnes AS og Vindafjord kommune arrangerte møtet saman. Vierdal starta med å fortelje om selskapsavtalen mellom Westcon og kommunen då Windafjord Port blei til. Han var tydeleg på at kommunen ikkje har gitt vekk eigarskapen til tomta, som etter avtalen skal bli overført til selskapet når Westcon gjer arbeidet i fase 1.

Einingsleiar Thomas Vestbø for areal og forvaltning i Vindafjord kommune gjekk gjennom prosessen frå 2023 og vidare planar. For tida er planforslaget frå Windafjord Port, utarbeidd av Norconsult, ute på høyring.

— Eg håpar flest mogleg seier si meining, sa Vestbø.

Høyringsfristen er 22. april. Folk på begge sider av saka oppmoda folk til å bruke retten sin til å bli høyrde dei neste vekene.

Store konsekvensar

Dagleg leiar Jørgen Jorde i Windafjord Port presenterte konsekvensutgreiingane. Tiltaket med å utvikle heile planområdet på om lag 500 dekar er vurdert til å ha svært stor negativ konsekvens for naturmangfaldet, som er den lågaste rangeringa i slike utgreiingar. Dei fleste naturkvalitetane finst på austsida av fylkesvegen som deler området i to. Samla konsekvens for landskapet er òg vurdert som stor negativ.

På den positive sida viste Jorde til analysar av lokale og regionale konsekvensar. I både anleggsfasen og driftsfasen er det forventa fleire hundre arbeidsplassar. Anleggsfasen kan vare til 2032. Det er òg venta auka tilflytting og redusert fråflytting til Vindafjord kommune. Likevel var fleire i spørsmålsrunden skeptiske til om prosjektet faktisk vil føre til busetjing i Vikebygd.

— Eg har aldri sett folkevekst frå ein brakkerigg, sa Sverre Hovland.

Jorde forklarte at dei legg til grunn at dei får ein gjentakande og heilårleg aktivitet.

— Ryggen mot veggen

Steinar Skartland utfordra Vierdal på kva som er gjort for å sikre at Vikebygd får noko igjen om prosjektet blir realisert. Ordføraren svara at dei enno ikkje har kome så langt at dei kan forhandle med konkrete aktørar.

Som nabo til industriområdet understreka Ivar Ødegård at han er inhabil i vidare behandling av planen, og uttalar seg som vikebu, ikkje kommunestyrepolitikar for Vindafjordlista. Han sa at han ikkje hadde flytta heim om han visste at prosjektet var på trappene, og at Vik oppvekstsenter følgjeleg hadde hatt to barn færre. Ødegård problematiserte trafikksikkerheita i samband med ei forventing om 35 lastebilar dagleg i anleggsfasen, så vel som ei kraftig auke i dagpendlarar. Vidare poengterte han at dette òg vil merkast i Skjold, når bilane køyrer på Isvik-sida.

Anders Lindøe i Eiendomsmegler 1 stilte spørsmål ved om det er gjort konsekvensutgreiing av verditap på eigedomar dersom prosjektet blir gjennomført. Einingsleiar Thomas Vestbø for areal og forvaltning i Vindafjord kommune svara at det er dei ikkje. Lindøe spurde om potensielle erstatningar for verditap. Kommunalsjef Halfdan Krohn Brekke for samfunnsutvikling svara generelt at det blir sivilrettslege spørsmål.

Den klart mest positive til prosjektet som tok ordet, var Gunnar Birkeland. Han føler media spring etter dei som ropar høgast og gir inntrykk av at det er eit klart fleirtal mot i bygda.

— For 20 år sidan hadde eg kanskje vore mot. No står me med ryggen mot veggen, sa Birkeland med vising til låge fødselstal i seinare år.