Angreip politiet – må framleis vera under tvunge psykisk helsevern

Haugaland og Sunnhordland tingrett har i dom av mars 2026 kome fram til at vilkåra for å oppretthalde tvunge psykisk helsevern framleis er til stades. Retten meiner det er ein konkret og nærliggjande fare for at mannen kan gjennomføra nye alvorlege valdshandlingar dersom tvangen fell bort. Vurderinga bygger på både tidlegare valdshandlingar, sjukdomsbiletet og risiko knytt til rusbruk.

Knivangrep og vald mot politi

Mannen blei i 2017 dømt til tvunge psykisk helsevern etter fleire alvorlege hendingar. Han forsøkte mellom anna å stikka ei kvinne med kniv i hennar eigen bustad i kommunen, og gjekk også til angrep på polititenestemenn med kniv. Same dag hadde han også stukke ein hund med kniv. Retten la til grunn at handlingane hadde stort skadepotensiale, og at det berre var tilfeldigheiter som hindra alvorleg skade eller død. Trass i positiv utvikling dei siste åra, meiner retten at risikoen framleis er høg. Eit sentralt moment er mannen sitt forhold til rus. Retten meiner det er sannsynleg at han vil begynna å rusa seg igjen dersom tvangen fell bort, noko som kan utløysa psykotiske episodar og vald. Retten peikar også på at mannen har avgrensa innsikt i eigen sjukdom og konsekvensane av rusbruk.