— Vald i nære relasjonar er høgt prioritert og noko me bruker mykje kapasitet på. Når barn er involverte, blir det endå meir omfattande, seier stasjonssjef Fredrik Alvestad ved Etne- og Vindafjord politistasjon.
Barn og ungdom som har vore utsette for vald eller seksuelle overgrep, får hjelp på Statens barnehus i Stavanger. Politiet organiserer og gjennomfører reisa dit. Vald i nære relasjonar er det alvorlegaste politiet har ansvar for lokalt. Dei er òg involverte i drapssaker, men desse blir handterte av Felles eining for etterretning og etterforsking (FEE).
I 2024 var det 29 valdssaker og mindre enn ti seksuallovbrot i Etne og Vindafjord. Året før var tala 19 og 16. Valdslovbrot omfattar alle former for vald.
