Nynorskelevane våre må få digitalt likeverd

Regjeringa sitt framlegg til ny opplæringslov er ikkje god nok for nynorskelevane. Som skuleiegarar i landets største nynorskfylke er vi heilt avhengige av at våre eigne partifeller justerer lova i Stortinget – slik at ho sikrar nynorskelevane ei opplæring på språket sitt.

Framlegget om språkdeling i ungdomsskulen og absolutt krav om nynorske skriveprogram er veldig bra. Men situasjonen i nynorske klasserom er så alvorleg at utan endringar vil den nye lova føre til ulike læringsvilkår mellom nynorsk- og bokmålselevane.

Den nynorske skulekvardagen inneheld for mykje bokmål, og digitaliseringa av skulen har gjort problemet større dei siste åra. Nynorskelevane blir ofte tilbydde digitale læremiddel på feil språk. Det hjelper ikkje at elevane får eigne språkklassar dersom dei ikkje har læremiddel på undervisingsspråket sitt.