— Me vil spreie glede på Etne Cupen

— Det er så gøy å kle seg ut, og så er det så kjekt å sjå kor glade folk blir når dei ser oss. Me gjer det for å spreie glede, sa jentene frå Os omtrent i kor, då Grannar kontakta dei under Etne Cup.

Det var ikkje mogleg å få forbi dei, for misjonen var fullført. Dei klarte å spreie glede, både med dei friske fargane dei var utstyrt med og ikkje minst det gode humøret.

— Det er fleire som har sagt til oss at dei blir glade når dei ser oss, og det synest me sjølvsagt er veldig kjekt, sa Malia Berg (11).

Å vera på Etne Cup er kjempekjekt, i følgje kvartetten. Så langt har dei 11 år gamle osingane vunne ein kamp og tapt ein, men ein siste kamp ventar før dei ser om dei går vidare eller ei.

Mat til tusen

Av og til kan det passa heilt perfekt at vêrgudane bommar på prognosane sine, for regnbyene som var lovde glimra med sitt fråvær. Temperaturen var heilt super, lettskya opphald og litt vind. Heilt perfekt for ein dag på fotballcup.

Det var liv og røre kor enn ein gjekk. Både inne i matsalen der 946 personar i skrivande stund hadde fått servert den tradisjonsrike laurdagsgrauten, i følgje kjøkkensjef Kjersti Skogen.

— Eg reknar med me når 1.500 personar før alle har fått mat. Det var over 1.300 til frukost i dag, sa ho.

I det nye kjøkkenet på Skakke var det lappesteiking som stod på agendaen, og i løpet av cupen blir det steikt lappar av over 4.500 egg til røra. Lappane er blitt litt av kjennemerket til Etne Cupen, og er mildt sagt kjempepopulære.

I kiosken var det også kø. Heile tida. Den heldige som endeleg var kome heilt fremst i køen då Grannar møtte opp, var Lars Jensen Voll på 9 år. Han måtte kjøpa seg litt snop før neste fotballkamp starta. Laget hans, Torvestad, hadde så langt vunne sin einaste spelte kamp med ganske mange mål, og taparlaget var denne gongen Djerv.

God stemning

Over alt kor ein gjekk var det ungar og unge ungdommar som bar på høgtalarar med høg musikk. Nokre hadde til og med høgtalarar som likna på trillekoffertar, og det dundra i god stemning over alt. Inne i foajeen på Skakke sat ei gruppe gutar som skrudde opp lyden på låten If you’re happy and you know it – clap your hands», og sekundar etterpå runga det med klappande hender rundt gutane.

Musikk var det ute på grasmatta også, og for dei som ikkje spelte kampar var det gjerne litt dans og gymnastikk som blei utfallet. For Ayra Elí Straumsøy (11), Heyli Straumsøy (9), Ella Aga Larsen (8) og Live Serine Eljervik (9) frå Skånevik, var det å stå på hendene som var gøy.

Godt oppmøte

Kampane som gjekk parallelt på mange forskjellige banar, hadde imponerande mykje publikum langs sidelinjene. Spesielt på tribunen og lang sidelinja på kunstgrasbanen var det eit mylder av folk, både spelarar som hadde spelepause, trenarar, foreldre, søsken og besteforeldre.