Målrikt i sesongens første heimekamp

Ølenslaget hadde allereie to seriekampar bak seg. Først eit knepent 21–20 tap borte mot Mastra, deretter eit 28–25 tap mot Austrått/Hana. Søndag var det Tasta 2 frå Stavanger som stod på andre sida av bana.

Sterk start av Ølen

Ølen kom godt i gong. Allereie i første angrep sat ballen i mål, og defensivt stod dei tett og aggressivt. Etter tre minutt stod det 3–0. To spelmål og eit sikkert straffekast frå Alvhild Nordtveit gav publikum ein lovande start.

Tasta jobba seg gradvis inn i kampen. Etter ti minutt var dei ajour på stillinga 5–5, og tempoet steig. Laget følgde kvarandre tett gjennom resten av omgangen.

Jamn første omgang

Ved halvspelt omgang stod det 7–7, før Ølen på ny tok leiinga. Kantspelar Helene Haukland avslutta kontant til 8–7, og like etter stod forsvaret godt samla. Ei rask kontring gav 9–7, sett inn av Ølens toppscorar Astrid Haugland Gundersen.

Men inn mot pause var det bortelaget som traff mest. Tasta fekk meir rytme i angrepsspelet, og Ølen sleit med å stå imot. Då pausesignalet gjekk, leda Tasta 13–15. Ein jamn og målrik første omgang.

Sleit med å få tak på kampen

Utover i andre omgang var det bortelaget som fekk mest taket på kampen. Dei klarte å halde på ein jamn to- og tremålsleiing.

På det meste låg Ølen under med fem mål, på stillinga 20–25. Men etter eit par sterke redningar frå Ølens keeper Bandana Wagley og godt angrepsspel med to straffemål av Astrid Haugland Gundersen, henta dei seg opp til 24–25.

Det heldt likevel ikkje heilt inn. Kampen enda med eit knipent 26–29 tap for Ølen.

– Ein skikkeleg slitekamp

Etter kampen var spelarar og trenar klare på at innsatsen var god, og sa seg nøgd med prestasjonen mot eit sterkt Tasta-lag.

– Me gir god innsats frå start, sa Silje Digernes Lothe.

– Det er ein skikkeleg slitekamp, sa Astrid Haugland Gundersen.

Trenar Rolf Gangdal var tydeleg på kva laget prøvde å få til.

– Me klarer jo å ta initiativ i starten av kampen, så vett me at om me gir det i frå oss så blir det tungt å jage heile tida.

Han legg til:

– Me treng kamperfaring for å klare å lese kampbilde og gjere dei rette justeringane. Me møter eit godt lag, og eg synst jentene gir 110 prosent i dag, og me spelar ein veldig god kamp. Men dessverre slepper me inn litt for mykje mål.

Han peika på at utfallet kunne vore annleis.

– Frå tidlegare erfaring, når me scorar så mykje som dette, så vinner me kampen.

Spelarane var einige om at det var tett og intenst.

– Alle hos oss måtte fighte, for me møtte god motstand, seier Lothe.

– Inspirasjon for dei yngre

Gangdal og spelarane meiner oppmøtet viser at håndballen engasjerer.

– Eg synst heile Vindafjord skal veta at det finst eit alternativ til fotball. Det er kjekt, me ser kva me får til med damelaget, det bør vera til inspirasjon for dei yngre å begynne på handball, seier Gangdal.

– Det er mykje kjekkare å spela når det er så mange på tribunen som i dag, legg Lothe til.