— Det er viktig å vise at ein er stolt av bygda si og jobben me gjer – og dette arrangementet er noko me er stolte av, seier Sandra Marie Sælemyr Skartland, som er blant dei åtte som står bak planlegginga av Kvamsåsen rundt.
Konkurranseløyper
Kvamsåsen rundt – 11 km: Start ved fotballbanen i Vikebygd. Løypa går nordover på hovudvegen mot Årvik, vidare i kupert traktorveg og terreng mot Kvamshamn, og på grusveg mot Kvame før retur på hovudvegen til mål ved fotballbanen. Traséen består av asfalt, grus og traktorveg/terreng.
Halvkvamsen – 5 km: Start og mål ved fotballbanen. Løypa går sørover forbi Jokerbutikken og opp mot Djupava, vidare på grusveg ned til Gamlatunet, på asfalt ned mot kyrkja, ut mot Plassabakeriet, til Naustvika via Liofeltet, før retur på hovudvegen til fotballbanen. Traséen består av asfalt og grus.
Minikvamsen – cirka 600 m: Start og mål ved fotballbanen. Løypa går ein halv runde rundt løpebanen, på sti ned mot transformatorkiosk, vidare på grusveg rundt bygdahuset, før målgang ved fotballbanen.
Dei andre er Lena Gåsdalen, Cathrine Hamre Tindeland, Alice Frøvik, Kjetil André Skartland, Joakim Bruland, Ivar Ødegård og Askev Julsrud.
Årets Kvamsåsen rundt blir arrangert laurdag 1. november. Som i fjor kan ein springe tre ulike løp (sjå faktaboks). Dei over 12 år kan springe heile Kvamsåsen rundt på 11 kilometer. Ein kan òg springe halvkvamsen på fem kilometer. Det kortaste løpet er minikvamsen på om lag 600 meter, og har ikkje aldersgrense.
Annonse
Frå løpet i fjor:
Stor dugnad
På løpsdagen skal over 50 frivillige stå på, med oppgåver som kafé, tidtakarsystem, løypepersonell, ansiktsmaling, hoppeslott og helsepersonell leigd inn frå Røde Kors. Med det som skjer i forkant, er dei endå fleire. Bruland fortel at dei i år har om lag 70 frivillige.
— På sjølve løpsdagen er det siste førebuingar med rigging, utdeling av startnummer, kiosksal, tidtakarsystem, medaljeutdeling og mykje løypemannskap som skal passe på at alle har det bra og finn vegen til mål. Så har me Rune Hetland, som tek seg av snakkingen, seier Bruland.
Annonse
Skartland peikar på at dei eldste frivillige på løpsdagen er over 70 år, medan dei yngste er ungdomsskuleelevar. Dei vaksne tek med seg ungane sine i planlegginga, slik at dei kan delta i tilpassa oppgåver som merking av løyper og rigging av bord.
— Dugnadsånda er høg i Vikebygd, då dei nesten får det inn med morsmjølka, seier Skartland.
Kvamsåsen Rundt blei ein folkefest i 2024.Arkivfoto: Jonas Sandsgård
Håpar på godt oppmøte
Kvamsåsen rundt blei arrangert for første gong sidan 2009 i fjor, og fekk god mottaking både blant bygdefolk og deltakarar frå nærområdet. Både Skartland og Bruland er godt fornøgde med fjoråret.
— Me var heldige med vêret, og alle involverte gjorde ein god jobb. Både publikum, deltakarar og frivillige såg ut til å ha ein fin dag, seier Bruland.
Det meste blir som i 2024, men etter evalueringa av fjoråret har dei gjort nokre små grep for å sikre at alt går som det skal – til dømes sterkare stiftar på merkjeskilt i løypa og varme i teltet. Skartland fortel at dei har satsa på litt ekstra underhaldning for ungane i år, med ansiktsmaling og hoppeslott.
Annonse
— Då har ungane noko kjekt å gjere medan så mange vaksne og ungdommar som mogleg skal springe løpet. Me håpar det kjem til å trekkje fleire småbarnsfamiliar til bygda denne dagen, seier Skartland.
I 2024 var det totalt 144 deltakarar på dei tre løpa. Skartland seier at dei håpar på rundt 130 deltkarar i år.
Like etter startsignalet gjekk på hovudløpet i 2024.Arkivfoto: Jonas Sandsgård
Engasjerer barna
Vikebygd IL er arrangør. Bruland og Skartland meiner at løpet er viktig for å halde oppe aktivitetsnivået i idrettslaget. I år har dei eit eige fotballag, pluss at dei er ein del av Fjordar-samarbeidet. På fotballsida er turneringa Vikeputten på våren eit årleg høgdepunkt.
Spurt om viktigheita av Kvamsåsen rundt for Vikebygd som bygd, svarar Bruland at løpet blir ein samlingsplass for alle på tvers av alder, der også utflytta vikebuer kjem heim for å treffe gamle kjenningar. Skartland synest at det alltid er kjekt når det skjer noko i bygda. Det å vere på dugnad saman og gjere noko felles, meiner ho, skapar samhald.
— Eg trur òg det er viktig for ungane i bygda å ha noko felles å fokusere på. Det gjer at dei har noko å snakke om, og det blir eit felles haldepunkt, seier Skartland.
Annonse
Kasper Bruland (f.v.), Sondre Stene Bauge, Jonas Maurangsnes og Sivert Øvstedal før løpet i fjor.Arkivfoto: Jonas Sandsgård
Ho synest at det er ekstra kjekt at Vik oppvekstsenter har hatt fokus på løpeglede i eit par månadar. Dei skal ha eige skuleløp for 1.–7. klasse to dagar før hovudløpet, og har fått sponsa t-skjorter frå Westcon. Formålet til oppvekstsenteret er å bidra til at elevane utviklar eit positivt forhold til fysisk aktivitet og rørsle, og fremje god helse og livskvalitet.
— Me håpar å sjå mange blå t-skjorter med Vik oppvekstsenter-logo på løpet, seier Skartland.
