Henta heim fleirfaldige medaljar
Ni utøvarar frå Etne Karateklubb deltok laurdag 1. november i Norges Cup i karate i Lørenskog.
Team Etne leverte under Norges Cup og kunne reise heim med mange medaljar.
– Ni medaljar blei det på gjengen, og me er nok ein gong den mestvinnande klubben her i landet. Det er veldig kjekt for utøvarar og trenarar når ein får att for all treninga som blir lagt ned! For dette er verkeleg ein gjeng som står på og møter opp på trening etter trening, skriv Beathe Hegerland i Etne Karateklubb i ei pressemelding.
Annonse
For fleire av utøvarane var dette ei av dei første turneringane, medan andre har lang erfaring frå konkurransesamanheng.
Niåringen Julia Jensen deltok i si første tevling og sikra seg bronse i fight. Vadim Scenikov deltok for første gong på fleire år og tok bronse i fight. Blant dei meir rutinerte deltakarane tok Jan Filip Jensen og Naglis Saulevicius gull i fight, medan Annika Tökés Krokå tok gull i fight og sølv i kata. Arianah Archival Thorstad tok sølv i fight, Hans Kristian Åsheim Havreberg sølv i kata, og Solfrid Lønning Haaland bronse i kata.
Frode Haaland deltok òg, men fekk ikkje plassering denne gongen.
Etne Karateklubb skriv i pressemeldinga at både trenarar og utøvarar er nøgde med innsatsen i tevlinga.
