Får bruke gammalt kunstgras på ny bane

Dette kjem fram i eit svarbrev frå Statsforvaltaren i Rogaland, signert fagleiar Kirsten Redmond Kristiansen for forureining og rådgjevar Erik Gisle Dirdal 20. oktober.

God nok kvalitet

Statsforvaltaren viser til førespurnad på e-post datert 15. oktober frå Fjordar Fotball om spørsmål knytt til gjenbruk av ein 10 x 15 meter kunstgrasbane. Fjordar Fotball er eit samarbeid mellom SK Vats, Vindafjord IL, Skjoldar IL og Vikebygd IL.

Det blei opplyst at på grunn av bygging av ny fotballhall i Vats, må ei ballbinge med kunstgras og tilhøyrande gummigranulat rivast og fjernast. Sjølve byggeprosjektet av hallen er stoppa opp, men hallen er riven.

Vidare blei det informert om eit pågåande prosjekt ved eit anna anlegg i Fjordar Fotball, der ein fast 3ar-bane (10 x 15 meter) skal etablerast inne på området til kunstgrasbana på Sandeid. Det blir opplyst at området der bana er planlagt plassert, ligg innanfor kantlister, gjerde og rister.

— Kvaliteten på kunstgraset skal vere meir enn tilfredsstillande til det tiltenkte føremålet, sidan det berre skal brukast av dei yngste spelarane og dermed vil ha avgrensa slitasje, skriv Kristiansen og Dirdal.

Skal bytte heile dekket på sikt

I e-posten til Statsforvaltaren informerer Fjordar Fotball om at dei har avtalt med ein entreprenør om bistand til flytting av kunstgraset mellom anlegga. Planen er å laste kunstgraset med tilhøyrande gummigranulat samanrulla på eit lasteplan med tett botn og tette sider. Sjølve lastinga skal skje inne på eksisterande idrettsområde ved bruk av gravemaskin med tilpassa klype.

Lossinga skal finne stad på idrettsområdet i Sandeid, der det blir køyrt inn og avlasta innanfor gjerdet på eit område godkjent for kunstgras. Fjordar Fotball har hatt kontakt med NFF om den nemnde planen.

— NFF stilte seg positive til forslaget, under føresetnad av at forureiningsforskrifta blir følgd, skriv Kristiansen og Dirdal.

Avslutningsvis opplyser Fjordar Fotball at den framtidige planen for kunstgrasbana på Sandeid er å bytte heile dekket, inkludert det som no er planlagt flytta, når slitasje og levetid tilseier det.

Merksemd på transport

Avslutningsvis kjem Kristiansen og Dirdal med Statsforvaltaren si vurdering. Dei skriv at Fjordar Fotball må vere varsame ved lasting, transport og lossing av kunstgraset, slik at gummigranulatet ikkje kjem på avvegar (forsøpling). Statsforvaltaren peikar på at det er viktig at lengda og høgda på kunstgraset under transport ikkje overskrid måla på lasteplanet, slik at overheng ikkje oppstår.

— Statsforvaltaren stiller seg bak vurderinga til Norges Fotballforbund og tek Fjordar Fotball sin plan til orientering, skriv Kristiansen og Dirdal.

Når det gjeld den framtidige planen om å bytte ut kunstgraset når slitasje og levetid tilseier det, minner dei om substitusjonsplikta. Utover dette har dei ingen merknader.