Bygger sin eigen rallycrossbil

I slutten av august i fjor sette trippel-norgesmeister Daniel Holten i gang sitt siste bilprosjekt, å byggja om ein brukt Ford Fiesta til rallycross-bil. Mesteparten av arbeidet gjer han for eiga hand, og målet er å vera klar i god tid før første runde i NM-rallycross i byrjinga av mai.

— Eg håpar bilen blir klar i god før NM slik at eg får testa bilen, seier Daniel Holten og viser fram den nylakka Fiestaen som er under ombygging inne i garasjen til Holten Motorsport i Vikedal.

Bilen, som blei kjøpt i Tyskland, er plukka heilt ned og delane som skal gjenbrukast har fått seg ein skikkeleg overhaling. Med unntak av det utvendige karosseriet, døra på førarsida og motoren som driv vindaugsviskaren, skal alt bytast ut og erstattast av nybygde deler eller deler som er flytta frå ein tidlegare løpsbil.