Kjell Hustveit og resten av eigarane i Ølmedal Kraft AS har tent pengar så det susar i slutten av 2021 og også i starten av det nye året. Året før gjekk dei derimot med 2 millionar i underskot. Han meiner ingen er tente med prisendringane dei siste to åra, og vil ha stabile prisar kraft som alle partar kan leve med.
Foto: Jon Edvardsen
Vil ha stabile straumprisar trass millionvekst
Mens mange bekymrar seg for straumrekninga, kan Kjell Hustveit og Ølmedal Kraft AS smile heile vegen til banken med firedobbel omsetning i 2021 samanlikna med året før. Men han ønskjer seg mest av alt stabile prisar.
— Jo, det er bra å vere kraftverkseigar med dei prognosane som er for kraftprisen i vinter, spesielt dersom den blir mild. Svært høge prisar kombinert med at det har vore ein del vatn i elva dei siste månadene, gir også eit godt resultat, seier Kjell Hustveit som er medeigar og dagleg leiar og styreleiar for Ølmedal Kraft AS.
Situasjonen er snudd heilt opp ned frå året før, i 2020, då dei gjekk 2 millionar kroner i underskot.
Omsetninga for to år sidan var heilt unormal med 1,465 millionar kroner, mens omsetninga i fjor er 8,359 millionar kroner og blir det beste året selskapet har hatt.
