Vil ha bedriftene med på laget
Møtet om flyktningar, arbeid og praksis er gratis og blir arrangert i Medvind-bygget i Ølensvåg 11. september. Ein melder seg på digitalt i forkant.
På nettsida si vender Medvind 24 seg til dei som er nysgjerrige på kva det vil seia å ha ein person med flyktningbakgrunn i praksis eller arbeid i si bedrift. Næringshagen viser til at det aldri før har blitt busett så mange flyktningar i Etne og Vindafjord som no.
Annonse
— For at endå fleire av desse skal koma seg ut i arbeid, treng me mange lokale bedrifter med på laget, skriv Medvind 24.
Ulik kompetanse
Ein klar overvekt av flyktningane som har kome til Grannar-distriktet det siste året, er ukrainarar, men det blir også busett flyktningar frå andre land.
Nye retningslinjer slår fast at minimum 15 timar i veka i introduksjonsprogrammet skal vere arbeidsretta. Dette for å få fleire i arbeid. Medvind 24 slår fast at for å lukkast med dette, treng dei samarbeid med fleire lokale bedrifter.
Annonse
— Flyktningane har variert bakgrunn med ulik kompetanse og erfaringar som dei ønskjer å bidra med i den norske arbeidsmarknaden, skriv næringshagen.
Erfaringar og tips
På programmet under møtet står mellom anna generell informasjon om busetjing og integrering av flyktningar. Ein får også lære om praksis i introduksjonsprogrammet.
Det vil bli delt erfaringar og tips, og dei frammøtte vil få døme på deltakarar. Dei vil også få ein oversikt over deltakarane sin kompetanse og erfaring. Det skal bli informert om språk og førarkort, samt verkemiddel gjennom NAV.
I tillegg til all informasjonen blir det tid til spørsmål og samtale.
