Vellukka marknad på Romsa

— Me har jo bada i regn og kaldt vêr dei siste vekene og var førebudde på paraplyar. Men med solgløtt og opphald og hadde me ein fantastisk dag, heilt til me hadde takka av for kvelden. Det sette det i gang igjen med øs, pøs regn! opplyser Anne Tone Salte Andersen til Grannar.

Ho er med i dugnadsmannskapet til Kystlaget Romsa, og fortel at marknaden har vore svært vellukka i år og.

— Mange glade båtfolk og tilreisande med årets gratis skyssbåt, sytte for god stemning mellom alle aktivitetane mannskapet til Kystlaget Romsa,hadde laget til på tunet , inne i Løo og inne i gamlehuset, fortel Salte Andersen.

Ho meiner Romsa er ein fantastisk plass som ein må ta vare på.

— Me har ein fabelaktig gjeng i Kystlaget, som syt for vedlikehald og oppussing av bygningane, og tilgang på straum. Saman med alle sauene på jordene, syt gjengen for å rydde skog, og prøver å halde kulturlandskapet slik det ein gong var. Me er mange frå by og land som er glade i desse fantastiske øyane like ute i fjorden, fortel Salte Andersen.

Ho slår eit slag for at ein saman, i frivilligheitas ånd, tek vare på Romsa-øyane, og utviklar dei til nye generasjonar som kjem etter.

— Øyane, landskapet og bygningane har ein historie me må bringe vidare til etterkommarane våre, og me gler oss til marknaden neste år, seier Salte Andersen.

Ho Friluftsrådet Vest kan ein lese at Romsa-øyane ligg aust i Bjoafjorden, ved utløpet av Ølsfjorden. Øygruppa består av den største øya, Romsa, dei tre litt mindre øyane Herøy, Glopsøy og Tolløy, i tillegg til nokre mindre holmar og skjer. Øygruppa har rike frilufts- og naturkvalitetar og er eit av dei viktigaste båtutfartsområda i regionen.