Finansminister og partileiar Trygve Slagsvold Vedum under ein pressekonferanse etter sentralstyremøtet til Senterpartiet.
Foto: Stian Lysberg Solum / NTB / NPK
Vedum hardt ut mot Frp: Noreg vart lurt
— Noreg vart lurt då dei bygde utanlandskablane under førre regjering, seier finansminister og partileiar Trygve Slagsvold Vedum og legg skulda på Frp.
Vedum og resten av sentralstyret i Senterpartiet samla seg måndag formiddag for å drøfte konflikten med regjeringspartnar Arbeidarpartiet om innføringa av tre EU-direktiv i EUs fjerde energipakke.
Etter møtet var Vedum klar i bodskapen om at Senterpartiet er sterkt mot å sleppe meir norsk makt til EU bit for bit.
Han gjekk til frontalangrep på Frp og tidlegare olje- og energiminister Terje Søviknes som var den som sat ved makta i Noreg då tredje energimarknadspakke vart vedteken under førre regjering. Han viste til at både Søviknes og Statnett hadde sagt at etableringa av fleire utanlandskablar ikkje ville påverke straumprisen i Noreg nemneverdig.
— Så Noreg vart jo lurt då ein bygde dei kablane. Og Noreg vart lurt av Terje Søviknes og Frp då dei sa at det å knyte seg til Acer ikkje hadde noka betydning. Alle som har betalt straumrekningar i dei siste fire åra, har jo sett konsekvensen av det, seier Vedum.
