Glade jenter på Haugesund Rideklubb sitt sølvlag. F.v. Silje Bringsvor Krakk, Benedicte Eggers Staalesen og Sara Berggren Liadal.
Foto: Privat
Vats-jente på sølvlaget
15 år gamle Silje Bringsvor Krakk frå Vats var avgjerande då Haugesund Rideklubb tok sølv i lag-NM i dressurriding.
Jubelen stod i taket då Haugesund Rideklubb i helga for første gong i historia tok medalje i eit lag-NM i dressurriding. Det skjedde då klubben sitt ponni-lag tok den nest gjævaste medaljen. På laget var forutan 15-åringen frå Vats, Benedicte Eggers Staalesen og Sara Berggren Liadal, begge frå Haugesund.
Benedicte Eggers Staalesen reid på Mr Magic, Sara Berggren Liadal på Sheridan og Silje Bringsvor Krakk på Roadlase Tango. Laget var det einaste frå regionen som var kvalifisert til å kunna ri under lag-NM.
Ekstra spesielt var det at Silje reid på lånt ponni, då hennar eigen ponni blei pensjonert i fjor, slik at ho berre hadde fått trena nokre få veker på Tango, før dei sette kurs mot Fredriksborg Rideklubb (Fredrikstad/Sarpsborg) kor NM blei arrangert.
