Ukrainske elevar på besøk

LESARBIDRAG: I ein hjarteleg og varm velkomst har Ølen vidaregåande skule motteke ukrainske gjestar frå Korosten, ein by nordvest i Ukraina. Dette besøket markerer eit langvarig samarbeid som har vart sidan 2003, der elevane ved Ølen vidaregåande skule har samla inn pengar til elevar i Korosten gjennom solidaritetsaksjonen, Dagsverk Korosten».

Fyrst var det pandemien, og så krigen, som gjorde ei reise for elevar frå Ølen vgs til Korosten umogleg å gjennomføre. Skulen fekk då innvilga å få nytte støtta frå Rogaland Fylkeskommune til at elevar frå Korosten kunne kome til oss i staden. Med hjelp frå THK-stiftinga, dagleg leiar Vidar Akselsen og koordinatoren Sergeiy, kunne han og ein delegasjon på seks andre ta fatt på den lange reisa frå Korosten.

På Ølen vgs fekk alle dei 300 elevane på skulen høyre om korleis elevane frå Ukraina opplevde starten på krigen og korleis dei har det no. Alle reiste seg og stod når nasjonalsongen til Ukraina vart sunge av Lisa (Yelyzaveta Borysevych). Mange sterke historier vart fortalde og elevane sat lydhøyre og høyrde på det ungdomane og dei vaksne fortalde om livet no og draumane for framtida for seg sjølve og landet sitt.

Me var ganske redde og det var skremmande med lyden frå stridsvogner og alle fly og helikopter som fauk over oss. Me kunne høyre at det var eksplosjonar og fekk høyre at det var bygningar i utkanten av byen som var øydelagde». Nokre gonger var straumen vekke så lenge at me ikkje fekk lage oss varm mat, eller det var så mange alarmar at me ikkje kunne gå opp frå bomberomma for å lage oss mat. No har me blitt litt vane med forholda og me blir ikkje så redde lengre, var skildringane Ølen-elevane fekk høyre.

Dette besøket gjorde at elevane fekk moglegheit til å reflektera over verdien av solidaritetsarbeid og viktigheita av å hjelpa andre. Gjennom sin innsats får dei ein smak av kva det vil seia å bidra til å skapa ei betre verd som er prega av solidaritet, respekt og moglegheiter for alle. Dette er ein lærdom som strekkjer seg langt utanfor skuletida og vil prega deira liv og haldningar i framtida.

I år, den 13. november, er det igjen dagen der alle elevane ved Ølen vidaregåande skule går saman for å utføra ein dags arbeid, verdsett til 400 kroner. Mottoet er “elevar hjelper elevar” og Ølen vgs er den einaste skulen i Norge som samlar inn pengar til byskular og landsbyskular i dette svært fattige området av Ukraina.

Johannes Langhelle, Ølen vgs