Varaordførar Gustav Løge Fosse (KrF) er førebudd på vanskelege kutt i budsjettet.
ARKIVFOTO: SVEIN-ERIK LARSEN
Vindafjord-budsjettet
— Trur ikkje me kjem utanom nedleggingar
Varaordførar Gustav Løge Fosse (KrF) slit med å sjå alternativ til å følgje kommunedirektør Yngve Folven Bergesen sitt forslag om å leggje ned skulen og barnehagen i Imsland og skulen på Bjoa.
— Slik utviklinga har vore, med eit barnetal som stadig går ned, og vanskar med å rekruttere folk, trur eg ikkje me kjem utanom nedleggingar, seier varaordførar Gustav Løge Fosse (KrF).
Han understrekar at han ikkje vil forskottere noko i budsjettet dei skal forhandle om med Sp og Ap, men har ikkje sett noko som løyser utfordringane på andre måtar. Løge Fosse er tydeleg på at nedleggingar må gjerast på ein god måte, med ein smidig overgang, slik at ikkje alle negative konsekvensar slår inn. Blant anna vil han sikre gode skyssordningar for barna.
God dialog med foreldra er viktig for varaordføraren, som vil følgje med på høyringssvara. Han veit det er delte meiningar, og at nokre av foreldra kan tenkje at om ein får planlagt dette godt, treng det ikkje vere veldig negativt. Samtidig er han klar over at kommunedirektøren har fått pes, og at politikarane vil få det same om dei går for nedlegging.
