Stor interesse for svømming – 160 aktive medlemmar

Det er måndag kveld og svømmetrening for tre av gruppene i den stadig aukande svømmegruppa til Ølen IL. Ein ivrig gjeng tredjeklassingar har nett kasta seg i bassenget og nå ventar ein knapp time med trening og moro. Tre vaksne trenarar passar på alt går føre seg i trygge former og viser dei unge svømmetalenta korleis ein skal trena crawl, bryst, rygg og butterfly.

Dei tre klassekameratane Nikolai Heggen Vestbø, Eivind Nilsen Riber og Christoffer Alvseike starta på svømming for fire år sidan og trivst svært godt i det våte element. Dei har ingen planar om å leggja sporten på hylla med det første og har mål om å bli best mogeleg med åra.

— Me vil fortsetja på svømming. Det er kjekt, seier dei tre tredjeklassingane som tidleg lærte seg å svømma.