Stor framtidstru etter kanonår

— Eg har veldig store forhåpningar til framtida. Med dei planane me har ser eg ingen grenser, seier styreleiar Johannes Helgevold i Helgevold Elektro AS, som grunnla selskapet i 1987.

Hovudkontoret deira ligg i Johannes Helgevold si heimbygd Sandeid. I tillegg har selskapet lokasjonar i Haugesund, Bygnes, Skudeneshavn, Tysvær, Suldal, Etne, Skjold, Skånevik, Kinsarvik, Stord og Bergen. Dei har oppdrag i fleire nordiske land.

Helgevold Elektro er i dag den leiande automasjon- og elektroentreprenøren på Haugalandet. Dei gjer oppdrag innan industri, prosjekt, akva, service og hus og heim.

— Me har mange spennande prosjekt på gang, seier Johannes Helgevold.

Historia om Helgevold Elektro starta i Johannes Helgevold sin garasje i Sandeid i mai 1987. Han omtalar utviklinga sidan då som fantastisk.

— Då eg starta hadde eg fingrane i alt, mens i dag er det ein proff organisasjon. Det er også forskjell på å ikkje ha kapital slik det var i starten, kontra å ha det og kunne investere slik me kan nå, seier Johannes Helgevold.

Målet hans har alltid vore å bli best mogleg, ikkje å få ein dominerande marknadsposisjon i seg sjølv. Styreleiaren ser kvalitet i samanheng med vekst. Spurt om når han skjønte at selskapet var i ferd med å bli den leiande aktøren på Haugalandet, svarar han at det skjedde noko i 2007 då dei kjøpte seg inn i Sundfør & Pedersen og Bravida si avdeling i Haugesund. Johannes Helgevold synest det er veldig kjekt å ha starta opp ei bedrift som han i dag ser som eit veldrive selskap i stor utvikling, men er tydeleg på at det ikkje berre er hans forteneste.

— Eg har alltid hatt med veldig flinke folk som har gitt jernet, seier styreleiaren, som også vil framheve kona Heidi som har bidratt i alle år og framleis jobbar på kontoret i Sandeid.

Samtidig som Helgevold Elektro veks, held dei på røtene sine. Snart er alle dei ti første tilsette saman i bedrifta igjen. Johannes Helgevold fortel at han får veldig mange positive tilbakemeldingar frå folk i Sandeid på det selskapet har fått til og at dei satsar og bygger ut i bygda.

Johannes si dotter, Anne Marit Helgevold Heggebø, var seks år gammal då faren starta Helgevold Elektro. For ho var selskapet ein naturleg del av oppveksten og minnast at det var lite skilje mellom jobb og privatliv. Ho begynte tidleg å svare på telefonar og gjere andre småoppgåver.

— Det gav meg gode verdiar og lærte meg mykje om kva som skal til for å lykkast, seier Helgevold Heggebø.

Ho fortel at faren stilte opp for ho då det var viktige ting på privaten, sjølv om det var travelt å vere leiar. I dag er ho styremedlem, ein av eigarane, og direktør for Business Support & Strategi. Dette var ikkje ein sjølvfølge for ho. I ung alder såg Helgevold Heggebø ikkje for seg at selskapet skulle bli så stort at det skulle bli behov for andre enn elektrikarar, noko ho ikkje hadde planar om å bli.

Nyleg blei Anne Marit Helgevold Heggebø og Johannes Helgevold nominerte til vekstprisen EY Entrepreneur Of The Year Norge saman. Helgevold Heggebø synest det var stas å bli nominert saman med faren.

2023 er truleg blant dei mest innhaldsrike åra i Helgevold Elektro si historie. I januar blei Helgevold Elektro AS og Helgevold Elektro Haugesund AS slått saman til eit selskap. I samband med samanslåinga erklærte selskapet eit mål om å nå 500 millionar kroner i omsetnad i 2025. I 2022 omsette selskapet for 270 millionar kroner.

— Me er i rute til å nå målet, og ligg an til å omsette for litt i underkant av 400 millionar i 2023, fortel Helgevold Heggebø.

Like etter samanslåinga annonserte dei planar om å tilsette 100 nye i bedrifta i løpet av året. Dette har dei klart. Talet er inkludert cirka 30 lærlingar. Helgevold Heggebø opplyser at dei alltid har hatt som mål at lærlingar skal bli faste tilsette etter fullført fagbrev.

Fokuset på straumprisar, det grøne skiftet og smarte løysingar dei siste åra har hatt positiv effekt for Helgevold Elektro. Lokalt har Vindafjord IL og Ølen IL skaffa fotballbanane sine i Sandeid og Ølen LED-lys med hjelp av selskapet, mens Skakke fekk montert 1.042 solceller på taket på Etne si storstove etter ein kontrakt på cirka fem millionar.

I april blei det kjent at Helgevold skal prosjektere installasjonen, levere prosesskabling, automasjon og kontrollsystem til Hima Seafood, som byggjer verdas største landbaserte oppdrettsanlegg for aure på Rjukan. Avtalen er verdt rundt 80 millionar og er den største nokon gong for Helgevold.

Bjørn Tollefsen starta som konsernsjef for Helgevold Elektro i januar. Han omtalar det første året sitt som aktivt og spennande, og roser dei tilsette for omstillingsevna i samband med samanslåinga av Helgevold Elektro AS og Helgevold Elektro Haugesund AS. Med låg arbeidsløyse på Haugalandet er han glad for å ha klart 100 tilsettingar i ein tøff marknad.

Konsernsjefen fortel at ambisjonane til selskapet i 2024 er å vinne kontraktar og tilsette, og halde utviklinga mot omsetnadsmålsetnaden for 2025. Neste år planlegg dei å gjere cirka 50 tilsettingar.

— Det er gode marknadsutsikter i alle segmenta våre, meiner Tollefsen.

Han ser på Haugalandet sin geografiske plassering som svært gunstig for vidare utvikling. Selskapet tek eitt steg om gongen, og vil sette nye vekstmål først etter at 2025-målet er nådd.

— Me er i midt i paien kva gjeld framtidas utvikling, seier Tollefsen.

Kva av segmenta som veks mest i åra som kjem trur han vil avhenge av kva geografiske val dei gjer. Nyleg opna dei eit kontor i Bergen kor dei tilsette ingeniørar.

I februar skal Ljoshallbygget i Etne stå klart. Bygget er eit samarbeid mellom Helgevold og Brødrene Mæland. Tollefsen fortel at selskapet gler seg til å flytte avdelinga si i Etne frå kontorlokale i Birkenes og sønn sine gamle lokale på Enge inn i eit toppmoderne bygg like ved E134.

— Skikkelege fasilitetar og utstyr er viktig for trivsel, seier Tollefsen.

Førebels er det fem selskap som har planar om å etablere seg i Ljoshallbygget. Johannes Helgevold fortel at dei ønskjer seg fleire, og at det er høve for å dele av sin eigen avdeling eller leige kontor i et felles kontormiljø. Det blir eit bygg med fleire forskjellige handverksbedrifter samla under eit tak, men det er også rom for andre aktørar å leige her. Samlokalisering vil absolutt skape ein synergieffekt for bedriftene.

Ljoshallbygget er planlagt med ei grunnflate på rundt 700 kvadratmeter.

Då Ølensrussen 2023 var innom på bedriftsbesøk tidlegare i år, sa Tollefsen til dei at ingen i Helgevold skal måtte slutte fordi dei manglar utfordringar. Han understrekar at også dei som er glade i jobben sin som eksempelvis montørar, og ikkje har noko ønske om å bli leiarar, får lov å dyrke og spesialisere seg i det dei likar.

— Mangfald er viktig for oss, seier Tollefsen og trekker fram at dei nyleg var nominert til Årets mangfaldsbedrift» av Elektroforeininga.

Alle som kjem innom hovudkontoret deira i Sandeid blir møtt av Ole Magnus Helgevold i resepsjonen. Han er blind, men har full kontroll på korleis han skal få gjestar til å føle seg velkommen og byr på ein kaffikopp når Grannar tek turen.

Ein kan nesten lukte optimismen som pregar selskapet når ein vandrar i gangane. På eit av kontora sit Kristian Eikemo, som er avdelingsleiar for teknisk. Her jobbar han tett med ingeniørar, prosjektleiarar og kalkulatørar. I tillegg til kontoret sitt i Sandeid, pleier Eikemo å ha ein arbeidsdag i veka i Haugesund. Han starta som kalkulatør i 2020 og blei leiar i mai 2023.

— Helgevold er ei spennande bedrift å vere i. Det skjer nye ting heile vegen. I tillegg er det eit godt arbeidsmiljø. Trivsel på arbeidsplassen er verdsett, seier Eikemo.

Også dei som er på veg inn i yrkeslivet verkar å trivast i bedrifta. Skåneviksbuen Espen Molnes Lauareid (19) er lærling som serviceelektrikar.

— Det er fint å vere lærling her og det er ein veldig kjekk arbeidsplass, seier Molnes Lauareid.

Blant det han likar er at det er mykje variert arbeid. Dei fleste oppdraga han er med på er ganske lokale i Skånevik.