Startar familiespeiding
Etter nokre år utan at det har vore familiespeiding i Etne, vil ei engasjert foreldregruppe starta opp igjen.
Det har tidlegare vore eit utbreidd og aktivt speidarmiljø i Etnebygda, men då koronaen kom stoppa det opp. Astrid Fagerjord Harboe er nå kontaktperson for familiespeiding i Etne. Ho prøvde også å starta opp rett før koronaen kom, men det blei ikkje noko av den gong. Nå vil ho prøva igjen saman med to andre familiar.
— Familiespeiding er ein fin måte å treffa folk ein ikkje treffer elles, det blir eit nytt møtepunkt der ein kan bli kjent med andre, seier ho.
Annonse
Dei legg terskelen lågt. Opplegget er først og fremst laga for barn i førskulealder, men Fagerjord håpar på at det kan vera kjekt for heile familien. Alle er velkomne. Det viktigaste er å koma ut i naturen, og at barna får gode opplevingar trass ver og vind. Det blir familiespeiding tre laurdagar fram mot jul. Speidaren i Etne har mykje utstyr som dei kan bruka.
— Me skal først og fremst vera ute i lag, brenna bål og ha det kjekt saman, seier Fagerjord.
Det vil vera felles aktivitetar som smådyrsafari og naturbingo, andakt, frileik og dei skal dei laga mat på bål saman. Dette er eit prøveprosjekt for å sjå om ein får folk med seg.
— Me treng fleire folk til å dra i gang dette, seier Fagerjord optimistisk.
