Spissar kompetansen

Nyleg avla ho eksamen i eit omfattande program med tema kundeservice, teamleiing og kjededrift.

Shell, eller St1 retail som eig og driv Shell-stasjonane i landet, har laga eit opplegg kor sentrale leiarpersonar tilknytt drift av energistasjonar tileignar seg ny kunnskap gjennom eit nettbasert læreprogram.

— Det bransjeretta opplegget gjorde at eg kunne gjera arbeidet då det passa meg, seier Sjurseike som er mor til tvillingar på to år.

Johanna Sjurseike fekk bensinstasjon i blodet frå ho var lita av. Oppvaksen på Knapphus som dotter av Anne Lise og Johannes Sjurseike, var ho tidleg i arbeid berre eit steinkast heimefrå.

— Sidan eg var ferdig økonomiutdanna i 2018 har eg jobba her, og etter kvart har eg fått på meg mange hattar. Me har henta tilbake rekneskapen som er ein funksjon som tar mange av timane mine, seier ho.

Ho verkar å vera litt i tvil om kva tittel ho eigentleg har, men klår er ho på at det er ein driftsjobb, og endar på at ho i praksis er operativ leiar. Andre omtalar henne som butikksjef. I alle høve er ho ikkje framand for i blant å ta vakter bak disken, endåtil ei og anna nattevakt.