Fotballspelar Bjørnar Aastvedt gler seg til den nye kunstgrassmatta er på plass.
Foto: Irene Mæland Haraldsen
Snart klar med nytt dekke
Arbeidet med den nye matta på fotballbanen i Etne er godt i gang, og går alt etter planen kan A-lagsspelar Bjørnar Aastvedt og resten av fotballspelarane ta banen i bruk når påskeferien er over.
Etter tolv års bruk var kunstgrasmatta på fotballbanen i Etne moden for utskifting. I slutten av september i fjor starta arbeidet med å få på plass ny matte og etter planen skulle arbeidet vore klart i løpet av hausten. Men utfordringar med drenering og leveringsvanskar på ny underlagsmatta førte til forseinking på fleire månader.
— Matta var godt nedtrødd og hadde lausna enkelte stader. Då matta blei tatt opp blei det også oppdaga enkelte søkk på banen. Firmaet Sport Surface tok ein dreneringstest og sette opp kummar i vinter. Testen viste at dreneringa ikkje var god nok. Alternativet var å byta ut massen eller byta ut dreneringsmattene under, fortel fotballspelar Bjørnar Aastvedt.
Valet fall på utbyte av dreneringsmatter, men på grunn av leveringsvansker måtte det vidare arbeidet med banen setjast på vent. Fredag kunne endeleg arbeidet med planering ta til og etter ein dags arbeid utført av Vassbakk og Stol var underlaget jamt og fint og klar for legging.
