Skulekampen held fram

— Vurderinga av barnets beste er ikkje god nok i utgreiinga, sa Anna Klette Steinsland (Vindafjordlista).

Ho sende saman med Tormod Sandsgård (Vindafjordlista) og Guri Ravatn (SV) inn eit krav om lovlegheitskontroll 6. januar. Dette var bakgrunnen for debatten.

Kan bli ny behandling

Klette Steinsland sa at ho ikkje har illusjonar om at saka blir omgjord, men at ho ønskjer å skape presedens for framtidig saksbehandling.

Kommunedirektør Yngve Folven Bergesen innstilte på at nedleggingsvedtaket var lovleg og burde sendast vidare til Statsforvaltaren i Rogaland. Ravatn føreslo derimot at kommunestyret skulle erklære vedtaket ulovleg fordi prosessen ikkje var korrekt. Forslaget fekk fire stemmer (Ravatn og Vindafjordlista sine tre representantar) av 24, og saka går no vidare til Statsforvaltaren. Dersom Statsforvaltaren konkluderer annleis enn kommunestyret, må saka opp til ny behandling.

17. desember vedtok fleirtalet i kommunestyret å leggje ned Imsland oppvekstsenter og skuledelen av Bjoa oppvekstsenter frå skuleåret 2025/2026 som del av budsjett og økonomiplan. Høgre, Frp, Ap, KrF og alle Sp-representantane, bortsett frå Anne Cecilie Berentsen, stemte for vedtaket.

Sterk usemje

Nedleggingane var ute på høyring etter at kommunedirektøren la dei fram i sitt budsjettforslag 29. oktober til vedtaket i desember. Klagarane meinte at høyringsfristen var for kort og gjennomføringa dårleg.

— Dette er ei påpeiking av manglande utgreiingar, sa Ravatn.

Ho kritiserte kommunen for ikkje å ha involvert viktige aktørar. Kommunedirektøren forklarte i sitt saksframlegg kvifor han meiner høyringa var lovleg. Han viste til brei medieomtale og møter mellom FAU og dei politiske gruppene i Vindafjord, både på Bjoa og i Imsland. Også andre bygdefolk fekk leggje fram sine synspunkt.

Folven Bergesen meinte vurderinga av barnets beste blei gjort både i barnehage- og skulebruksplanen i 2022 og i budsjettrunden. Ravatn uttala at ho var sterkt ueinig i kommunedirektøren sine vurderingar og sa at møta i bygdene var gjort utan lokalbefolkninga si medverknad. Ho poengterte at elevane på mellomtrinnet, som blei flytta frå Bjoa til Ølensvåg for skuleåret 2024/2025, ikkje har blitt spurde i prosessen.

Etter innlegget hennar blei SV-politikaren irettesett av ordførar Ole Johan Vierdal (Sp) for å bruke ordet flåsete» på talarstolen i omtalen av saksutgreiinga.

Fryktar for handlingsrommet

Klagarane møtte motbør hos Høgre, ved Håvard Rørtveit og Therese Nesheim. Rørtveit klarte ikkje å sjå saka som anna enn ei grunnleggjande mistillit mot kommunedirektøren og administrasjonen, og han oppfatta det som alvorlege skuldingar.

— Kommunedirektøren må få gjere vurderingar, og me politikarar må gjere våre vedtak, sa Rørtveit.

Han meinte at å overstyre nedleggingsvedtaket ville avgrense den politiske kontrollen. Han illustrerte med eit scenario der kommunedirektøren foreslår å bevare skular, men kommunestyret vedtek nedlegging, noko som då ikkje ville ha vore ute på høyring.

Trur på skulemangfald

Til motsetnad til i budsjettvedtaket fekk ikkje SV og Vindafjordlista stemma til Anne Cecilie Berentsen (Sp). Etter møtet forklarte ho at det viktigaste er at saka går til lovlegheitskontroll. Ho støttar at klagarane tok opp saka.

Sidan vedtaket om nedleggingar har selskapet Vindafjord Montessoriskule AS blitt stifta og sendt søknad til Utdanningsdirektoratet (Udir) om å få opprette privatskule på Bjoa. Berentsen er i utgangspunktet positiv til ein montessoriskule og rosar initiativtakarane for ståpåvilje.

— Ein slik skule vil tilføre Vindafjord-skulen mangfald, sa Berentsen.