Skal halde tale til kongeparet

— Eg er veldig spent. Det er ei ære å bli spurt, seier Eva Vatnedal Nordtveit.

Ho og Erik Hjelm Fjeldheim skal dele på fire minutt av det halvannan time lange programmet kong Harald og dronning Sonja får med seg i Ølen torsdag 30. mai.

— Symbol på Noreg

Hjelm Fjeldheim var den første leiaren i Vindafjord ungdomsråd, og blei etterfølgd av Vatnedal Nordtveit. Innlegget deira har fått tittelen Vindafjord i dag og framover, unge stemmer».

— Me skal snakke om korleis det er å vere ungdom i Vindafjord, fortel Vatnedal Nordtveit.

Vatsbuen likar kongeparet og omtalar dei som eit symbol på Noreg. Ho synest dei verkar hyggelege og morosame på tv, og at det blir spennande å sjå korleis dei er i verkelegheita.

Den siste tida har Vatnedal Nordtveit vore travel med den avsluttande delen av det vidaregåande skuleløpet sitt på Ølen vidaregåande skule og russefeiring. Ho fortel at ho har hatt det kjekt i russetida og at dei har fått dyrka eit fint fellesskap. Vatsbuen var leiar i Ølensrussen sin aksjonskomité til Kreftforeningens innsamlingsaksjon, kor dei samla inn mest pengar både per elev og totalt i Rogaland.

Til hausten satsar Vatnedal Nordtveit på å studere i Bergen. Ho har mest lyst til å studere akvamedisin/fiskehelse. På lenger sikt er ho framleis veldig usikker på om ho kjem til å bu i Vindafjord, men det hadde ikkje overraska ho om det blei slikt.

— Eg trivst godt. Det er ein fin plass, seier vatsbuen.

Ritual ved matsal

Også for Hjelm Fjeldheim blir det første gong han møter kongeparet ansikt til ansikt. Han har likevel god erfaring med kongehelsing».

— I førstegongstenesta måtte me helse til eit bilete av kongen før me fekk gå inn i matsalen, fortel skjoldabuen.

Forutan ritualet i førstegongstenesta ser han på kong Harald sin nyttårstale kvart år. Han ser for seg at cirka tre minutt av han og Vatnedal Nordtveit si tildelte tid vil gå til å halde innlegg, og at denne blir delt likt, slik at dei får halvanna minutt taletid kvar.

— Det er ikkje ofte eg får i oppdrag å halde ein slik tale. Eg håpar på det beste, seier Hjelm Fjeldheim.

Nyleg fekk han sommarferie etter eit år på Valdres Folkehøgskule. Hjelm Fjeldheim er vararepresentant til kommunestyret i Vindafjord for Ap. Til hausten vil han studere informatikk på NTNU i Trondheim. Hans langsiktige plan er å ta mastergrad i dette før han vil flytte heim til garden i Skjold og jobbe som IT-konsulent. Han har allereie sitt eige konsulentselskap Fjeldheim Services, marknadsført som Fjelldata Bedrift. Gjennom dette lagde og driftar han blant anna Skjold Arena si nettside.